السلالالام عليكم
هعلمكم تعملوا ابسط كيكة فى الدنيا كلها ولو ما فيش عندك الامكانيات هديكى كمان بدائل
المقادير بملعقة الاكل العادية
المقادير
20ملعقة دقيق
15ملعقة سكر
4ملاعق سمن او ربع كوب زيت
4بيضات
كيس فانيليا
كيس بيكنج بودر
السائل هيكون كوب لبن او كوب عصير برتقال او كوب كاكاو سائل
الطريقة
هتضربى الاربع بيضات بايديكى عادى فى طبق بلاستيك
انا بضربها بايدى عادى بس بضربها شوية يعنى اد خمس دقايق ثم اضيف السمن والسكر مع الضرب
وبعدها الفانيليا والدقيق ثم البيكنج بودر بس نضيف الدقيق شوية شوية ونقلب برضة ويكون التقليب فى اتجاه واحد
ومع التقليب نضع السائل
تعالوا اقولكم على فكرة مجنونة وبتطلع ناجحة بضع مكان السائل كوب عصير تانج بتبقى تحفة وطعمها يجنن
ضربنا العجينة ضرب مبرح
ندهن الصينية سمن او زيت حسب المتاح عندك
وبعدها نرش الصينية شوية دقيق
ونكون مسخنين الفرن قبلها ونضعها فى الفرن ويكون الفرن واطى شوي
ونفتح بعد تلت ساعة
وافتحى الفرن بشويش
خديها منى نصيحة كل ما هتضربى البيض كويس كل ما هتحصلى على نتيجة احلى
لو كسلانة تضربى اضربيها فى الخلاط وخصوصا البيض
اظن ما قصرتش معاكم اهوة
احبكم فى الله
الرئيسية 
مركز الرفع 
