[/center]
[center]
أجازة أجازة .. مين مسافر فى الأجازة ؟؟
كتير مننا بيوضب حاجته .. وبننزل السوق كتير نشترى هدايا وأغراض لينا وهدايا لأهلنا وحبايبنا .. وبنتــشغل بتوضيب الشقة علشان كلها أيام وماشيين
بس ياترى فيه حاجات تانية ممكن تكون نقصانا ؟
تعالو نشوف مع بعض :
1- النية :
* إنوى إن سفرك دا يكون لله .. وإنك نازلة تصلي رحمك وجوزك يصل رحمه وأولادكم يصلوا أهلهم و قرايبهم .. .. وتتواصلي وتتطمنى على جيرانك وأصحابك اللى بقالك كتيييير ماشفتيهمش
* وانوى أنه يكون سفر للترويح عن النفس .. وتغيير جو .. وشحن بطارياتنا اللى خلاص فضيت
* فرصة وأنا فى الطريق أتفكر فى الكون ومخلوقات الله وأحوال عباده .. ودى عبادة روحانية هايلة ومهجورة للأسف .. وهى عبادة التفكر
* ونية كمان إن نزولك يكون سبب خير للى حواليكي .. بمعنى : حد محتاج أساعده , حد مريض أزوره , حد زعلان من حد أحاول أصلح مابينهم , حد عايز يتجوز أسعى فى جوازته , حد عنده مشكلة أحاول أحلهاله أو على الأقل أشاركه همه.
وكتير ممكن يقول اللى فينا مكفينا حننزل نشيل هم غيرنا كمان !! ...
حرد عليكي وأقول زى ماقالنا الرسول : (والله فى عون العبد ماكان العبد فى عون أخيه)
وصدقينى العطاااء دا متعة .. دا غير ثوابك عند ربنا
* وانتى بتشترى الهدايا .. إية رأيك فى نية تهادو تحابو ؟ وكمان نية إدخال السرور على مسلم بإعطاءه الحاجة دى
اشترى الحاجة بحب .. وعلى حسب إمكانياتك وماتتكلفيش فوق طاقتك .. وسيبك من الغمز واللمز اللى كتير بيشتكو منه, وإن ماحدش بيعجبه العجب مهما جبنا ..
إنتى نيتك انا بحبكم و فاكراكم وعايزة افرحكم .. وغرضى من ورا دا كله رضا ربنا.
وياسلام بقى لو كان قريبك ومحتاج او غلبان .. تبقى صلة رحم , وصدقة فى صورة هدية من غير مانحرجه
2-معارفك و جيرانك واصحابك عرفو إنك نازلة ؟؟
تليفون صغير سلمى عليهم , علشان ماحدش يزعل منك انك سافرتى من غير ماتقولى .. ولو مش مالكة ابعتى رسايل على الموبايل .. أو كلمى اتنين تلاتة ووصيهم يسلمولك على الباقى لضيق وقتك.
ودعاء المسافر للمقيم اوعى تفرطى فيه .. روووعة بجد
(استودعكم الله الذى لا تضيع ودائعه )
وهما يردو عليكى : ( أستودعُ الله دينكى وأمانتَكى وخواتيم عملكى )
واعرضى عليهم خدماتك .. ولو حد عايز يبعت حاجة ماتتحرجيش انك تعتذرى لو مش حينفع , أو إنك تشترطى قلة وزنها لو وزنك محدود , أو عادى لو ماعندكيش مشكلة .
3- رد الأمانات لأهلها
لو عندك حاجة كنتى وخداها من حد على سبيل الاستعارة , رجعيها ..ولو حد عنده ليكي فلوس , سدديها .. او على الاقل استسمحيه لحد ماترجعى وترديهاله لما ربنا يفرجها
4- وانتى بتقفلى الشقة وخلاص ماشية جميل برضو انك تستودعيها الله وتقولى ( استودعكى الله الذى لاتضيع ودائعه ) وسيارتكم برضو كذلك , وأى ممتلكات ليكم.
5- خلاص ركبتى العربية أو الباص ورايحة المطار أو الميناء حسب مانتى مسافرة .. نقول دعاء السفر:
(الله أكبر الله أكبر الله أكبر , سبحان الذى سخر لنا هذا وماكنا له مُقـْرنِين وإنا إلى ربنا لمنقلبون , اللهم إنا نسألك فى سفرنا هذا البر والتقوى ومن العمل ماترضى , اللهم هوّن علينا سفرنا هذا واطوِ عنا بُعدَه , اللهم أنت الصاحب فى السفر , والخليفة فى الأهل , اللهم إنى أعوذ بك من وَعْثَاء السفر , وكآبة المنظر , وسوء المنقلب فى المال والأهل )
ودا موجود فى حصن المسلم .. وياريت واحد يقراه والباقى يردد وراه .. أو كل واحد يقراه ويديه للى جنبه.
6- ولما بتركبى أى وسيلة مواصلات ( سيارة , باص , تاكسي , طيارة , عبارة , تكتك حتى ) قولى دعاء الركوب :
(بسم الله , الحمد لله "سبحان الذى سخر لنا هذا وماكنا له مقرنين وإنّا إلى ربنا لمنقلبون " الحمد لله , الحمد لله , الحمد لله .. الله أكبر , الله أكبر , الله أكبر .. سبحانك اللهم إنى ظلمت نفسي فاغفر لى فإنه لايغفر الذنوب إلا أنت )
7- نصلي ازاى؟؟
الصلاة لا تسقط عن المسلم البالغ العاقل بأى حال من الأحوال .. وكتير للأسف بيضيع صلواته وهو مسافر .. ويقول لما اوصل ابقى أصليهم قضاء!!! مع إن المسافر محتاج أكتر من غيره لعناية ربنا وحفظة علشان يوصل بالسلامة
ومن تيسير ربنا انه سهل لنا أداءها وجعل فيها رخصة .. إزاى ؟؟
أولا: لابد إن المسافة الكلية للسفر تزيد عن 89 كيلو علشان يبقى مسموح لنا القـَصْروهو اداء الصلاة الرباعية (الظهر والعصر والعشاء ) ركعتين بدلا من اربعة .. وإذا كانت المسافة أقل , بنصليها أربعة عادى
ثانيا: ينفع أنه يقصر بمجرد مايتجاوز عمران وبنيان مدينته .. يعنى مش شرط يوصل للمطار أو الميناء
• بنصلي الظهر قصرا ركعتين والعصر ركعتين .. وممكن نجمعهم ونصلي الظهر والعصر فى وقت الظهر وكل واحدة ركعتين زى مااتفقنا(جمع تقديم) .. أو نأخرهم ونصلي الظهر والعصر فى وقت العصر , كل صلاة ركعتين(جمع تأخير).
• والمغرب 3 ركعات , والعشاء ركعتين .. ويانصلي الفرضين فى وقت المغرب .. او نصليهم فى وقت العشاء.
• والسنن الرواتب اللى بنصليها مع كل فرض .. فيها رخصة اننا نتركها.. لأننا اختصرنا الفرض , فبالتالى غير مطالبين باداء السنن.
• وففيه حاجة جميلة قوى .. إنك ممكن تصلي النوافل زى: الضحى والوتر والاستخارة وقضاء الحاجة وقيام الليل, وانتى قاعدة مكانك فى السيارة او الطيارة من غير ماتتجهى للقبلة.. لفعل النبى صلى الله عليه وسلم لذلك وهو على ناقته مسافرا.
8-وبالنسبة للوضوء..
لو مافيش ماء .. أو الماء كان قليل لو اتوضينا منه مش حنلاقى نشرب , فيه رخصة لنا وهى التيمم بالتراب..وهو إنى أضرب بكفين إيديا التراب الطاهر ضربة واحدة , ثم أمسح ايديا (كأنى برغى بصابونة كدا ) ثم أمسح وجهى بكفين ايدى مرة واحدة .. وبس خلاص .. كدا ابقى جاهزة للصلاة زى الوضوء تمام
9- الدعااااااااااااااااء
فرصة اوعى تفوتيها .. دا كنز .. خصوصا وانتى مسافرة .. ادعى باللى نفسك فيه من خير الدنيا والآخرة .. وادعى للمسلمين ربنا يصلح حالهم وبلادهم
قال النبي صلى الله عليه وسلم (ثلاث دعوات مستجابات لا شك فيهن: دعوة المظلوم ، ودعوة المسافر، ودعوة الوالد على ولده)
10- خلاص وصلتى بلدك بالسلامة ونزلتى أرضها .. عندك دعاء جميل قوى عن النبى صلى الله عليه وسلم لدخول القرية أو المدينة:
( اللهم رب السماوات السبع وما أظللن ورب الأرضين السبع وما أقـْلَلن ورب الشياطين وما أضللن ورب الرياح وما ذَرَين .. فإنا نسألك خير هذه القرية وخير أهلها .. ونعوذ بك من شرها وشر أهلها وشر ما فيها )
ولو بتنزلى فى بلد كاستراحة أو ترانزيت مثلا أثناء الطريق , .. قولى الدعاء دا برضه.
ولو لحد دلوقت مش عارفة حتنزلى ولا لأ الصيف دا .. أو مترددة فى تاريخ السفر .. عليكي بصلاة الاستخارة .. وربنا يقدملك الى فيه الخير
وياريت لو حد عنده أى فكرة أو فائدة أو إضافة .. يقول ومايبخلش علينا .. ويجعله كله فى ميزان حسناتنا
الرئيسية 
مركز الرفع 
