انا ليه عايزة مرتضى منصور يبقى رئيس جمهوريه

ف عهد مرتضى حيبقى فيه تغيير جذري ف سياسيات البلد ..حنشيل النسر اللى على العلم وحنحط مكانه "سي دي "
=================
...وكمان حنغير النشيد الممل بتاعنا " بلادي بلادي " وحيبقى " سى دي وصالك زاد عليا حنينى
=================
مرتضى منصور حيبقى اول رئيس غير واضحة اتجاهاته السياسية هو ضد كل حاجة
ضد الثورة وضد البرادعي وضد الاخوان وضد نظيف و اخيرا بقى ضد مبارك ومرضاش يدافع عنه
=================
هما سنتين بالظبط من حكمه ويتخنق و حيسيب البلد ويرفع قضية علي مصر
=================
ف عهد مرتضى منصور حايتلغى الجهاز القضائي والمحاماة ف مصر لان اى متهم حايتظبط مش حيقدر حينكر اى تهمة عملها


هم بس يجيبوه كدة قدام مرتضى منصور اللى اول ما يشوفه حايفتكره ويقوله
مش انت يلا صبحى ابن الحاج مسعود مش فاكر لما كنت بتسرق حتت اللحمة من حلة المحشى وامك نايمة


حاينهار المتهم ويكر بكل حاجة عملها او حتى فكر يعملها هو المواطن المصري ايه غير شوية سى ديهات فوق بعض عند مرتضى منصور
=================
احلى حاجة حتبقى ف عهد مرتضى منصور ان المختليين عقليا مش حتيجى رجليهم ف اى حادثة بعد كدة اى حاجة تحصل ف مصر حايلبسها اتنين ممدوح عباس وحسن صقر
=================
اما شوبير بقا فقدامه حليين يا ينتحر يا يتزعم المعارضة ف مصر ومرتضى يفضل يطلعله سى ديهايه عليه كل شهر لحد ما ينتحر برضه ف الاخر
=================
مرتضى منصور محامي شاطر جدا ..حايثبت وبالقانون والمستندات ان مصر كسبت كاس العالم قبل كدة مرتين بس احنا مخدناش بالنا
=================
مرتضى منصور حايكسر الحاجز بين المواطن والريس بتاعه ..مش حيقعد يقولك الاخوة المواطنون وحريص كل الحرص ولم اكن انتوى ..والكلام الكبير دة


مرتضى مسخرة ودمه خفيف حيبقى ليه خطاب كل يوم نسعمو واحنا بنتعشى يقعد يحكى لينا اى حاجة قبل ما ننام هى بس مشكلته انه مش حيتذاع ع الجزيرة على نايل كوميدي
=================
ف عهد مرتضى الزمالك حيبقى النادي الرسمي ف مصر وابو تريكة حيطلع يقولك دة انا اصلا جيت الاهلى غلط , اما النادى الاهلى ف حيفضل منه قلة مندسة مش هتقدر تعلن عن هويتها وحايعرفو بعض بكلمة سر ويتقابلو ف مقرات سرية وحايتعمل جهاز ف امن الدولة اسمه جهاز مكافحة الاهلوية
=================
مرتضى عصبي جدا و دايما بيتنطط قدامه من 42 : 64 عفريت ودة حايدخلنا ف مغامرات مالهاش حل يعنى مثلا لو ف مؤتمر دولي و اوباما دخل من غير ما يقوله جود مورينج يا مرتضى حيقفش جدا وهيطلعله السيديهايه بتاعته وحايعلن الحرب تانى يوم ع امريكا او هم يجولنا يحاربونا هنا او نتقابل ف اى دولة محايدة نحارب فيها بعض
=================
مرتضى منصور دايما عنده حلول لكل حاجة ودايما بتبقى مبتكرة يعنى مثلا عشان الزحمة ممكن ييجى يوم ويكهرب المترو فيخلص من نص الشعب وبالمرة يخلص من مشاكل الاسكان والبطالة والفقر
=================

ههههههههههههههه
بجد تسلم الايادى

هو شخصية لذيذة

ومحيرة ههههههههههه

احترم فيه بره لوالديه

وزمالكاوى زى العسل زيك كده يا فيونكة

هههههههههه

ههههههههههههههههه
الراجل ده تحفة
الله يهديه
وحشتوووونى