كل سنه وانتم طيبين
العيد بقى عالابواب وفاضل حوالى عشر ايام
وبدأنا نسمع والله لسه بدرى والله يا شهر الصيام
فدى وصفات الكحك واخواته للى عايز يعملها فى البيت
بس اهم حاجه انه يلاقى دقيق كويس .. يعنى يجيب اغلى دقيق
والسنه دى الدقيق الكويس لن يقل سعره عن 3.25 جنيه
الكحك
نص كيلو سميد و 1 كيلو دقيق و كوبايتين سمن نوع محترم
كوباية زيت ذرة و بيضتين و حوالى كوبايتين لبن دافى
و نحط معاهم 1 ملعقة كبيره خميرة عاديه و معلقة صغيره سكر (ولا تستعملى الخميرة السريعة )
و نضيف للدقيق معلقه كبيره ريحة المعمول او الكحك من عند العطار
نخلط السوائل كلها مع بعض ونسيب نص اللبن لضبط العجين
نضيف خلطة السوائل للدقيق و ريحة المعمول او الكحك مع معلقتين ماء زهر
ونعجن كويس ونضبط تخانة العجين بباقى اللبن
نسيب العجين متغطى بقماشه يخمر حوالى ساعه
ثم نقطع حتت صغيره ونحشيها باى شئ نحبه ( جوز / تمر / تين مجفف )
ونلم الاطراف ونرص فى صاج الفرن وممكن ننقشه لو نحب
ويدخل فرن حار حوالى 10-15 دقيقه ثم تحمير الوش
ويخرج يبرد ونرش على وشه سكر بودره ..ودى فايدة النقش لعدم انزلاق السكر
البتى فور
كوبايتين دقيق وكوباية سكر وتلاتربع زبده
كيس بيكنج باودر وبيضتين ومعلقتين كاكاو ومربه ومبشور فستق او لوز
هانضرب السكر والزبده لغاية مرحلة الكريمه ونضيف البيض ونكمل
ونخلط البيكنج باودر بالدقيق ونضيفه بالتدريج مع العجن لغاية تماسك العجينه
هانقسمها نصين ونضيف الكاكاو لنص منهم
هايبقى عندنا عجينه لونين نشكل ونخبز كل لون لوحده
طبعا باى اشكال تحبها ممكن كور صغيره او باستعمال القمع او بالقوالب
بعد ما تستوى نسيبها تبرد ونبدأ نلزق كل اتنين من لونين مع بعض بالمربه
ونزوق الاحرف بمبشور المكسرات او بدون
الغريبة
كيلو دقيق و 3 كوبايات زبده و كوباية سكر بودرة و بياض بيضتين
و فانيليا و لوز مقشر و فلقات للتزيين
هانضرب الزبده مع السكر لغاية الكريمه
هانضرب بياض البيض مع الفانيليا ونضيفه للى فات
بعد كده نحط الدقيق بالتدريج اثناء دوران العجانه و حتى تكون عجين لا يلتصق
نشكل العجينه وحدات صغيره مغروس فى قمتها نص لوزه
المهم نسيب مسافات بين الوحدات لمنع الالتصاق
و ندخلها فرن متوسط الحرارة لغاية السوى التمام
ونخرجها نبردها على طول
بسكويت النشادر
تلات كوبايات دقيق و كوباية نشا و كوباية سمن معتبر
بيضتين و كيس بيكنج باودر و فانيليا و شوية لبن لضبط العجين
نضرب السكر والسمن حتى النعومه و مرحلة الكريمه
نضرب البيض والفانيليا و نضيفه للى فات
نضيف الدقيق والنشا والبيكنج باودر بالتدريج حتى نصل لعجينه يمكن تشكيلها
ويمكن ضبطها باستعمال شوية لبن
بعد كده نشكل البسكويت سواء بالماكينه الخاصه او القمع او اى شئ
و ندخلها فرن متوسط برضه زى الغريبه.... لغاية اللون الذهبى
ونخرج البسكويت يتبرد على طول
بسكويت لانكشير
تلات كوبايات دقيق و كوباية مطحون رز ناعم اوى زى الدقيق
كيس بيكنج باودر و نص معلقة ص فانيليا و كوباية زبدة سايحه و زيها سكر و بيضتين
هانضرب الزبده مع السكر البودرة لغاية مرحلة الكريمه و نضيف البيض لغاية الامتزاج التام
نوقف الخلاط ونضيف باقى المقادير مع التقليب بخفه بمعلقة خشبية
المهم هانعجن بالايد لغاية ما تسيب الايد
هاناخد حتت صغيره من العجينه و نعملها كور و نرصها فى صاج الفرن
و بعد الخبيز نطلعها تبرد و ممكن نلزق كل قطعتين بمربه
وندحرجها بعد كده فى مبشور الفستق او جوز هند مبشور حسب الرغبه
وبالف هنا .... وموضوع الفطار شغال عادى
وكل سنه وانتم طيبين
صباح الفل
الرئيسية 
مركز الرفع 
